𐴌𐴡𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴔𐴡𐴃 𐴔𐴝𐴊𐴌𐴝𐴏𐴝𐴃 𐴇𐴥𐴝𐴔𐴓𐴝: 𐴀𐴝𐴌𐴑𐴝𐴕 𐴀𐴝𐴊𐴧𐴠  𐴁𐴝𐴚𐴓𐴝𐴊𐴠𐴐𐴡𐴌 𐴔𐴟𐴏𐴡𐴓𐴔𐴝𐴕𐴡𐴓𐴧𐴝 𐴑𐴞𐴏𐴧𐴟 𐴕𐴡𐴏𐴞𐴇𐴡𐴃

𐴈𐴡𐴊𐴞𐴕 𐴀𐴝𐴒𐴠 𐴌𐴡𐴇𐴙𐴝𐴚𐴒𐴙𐴝 𐴑𐴠𐴀𐴔𐴡𐴌 𐴀𐴠𐴑𐴧𐴝𐴕 𐴔𐴝𐴊𐴌𐴝𐴏𐴝𐴃 𐴇𐴥𐴝𐴔𐴓𐴝 𐴀𐴡𐴘𐴧𐴠| 𐴀𐴞𐴙 𐴇𐴥𐴝𐴔𐴓𐴝 𐴀𐴞𐴘𐴝𐴕𐴡𐴃 𐴈𐴡𐴀𐴠𐴑𐴎𐴡𐴕 𐴃𐴝𐴓𐴞𐴁𐴟𐴓 𐴀𐴞𐴓𐴡𐴔, 𐴀𐴝𐴓𐴠𐴔 𐴀𐴝𐴊𐴧𐴠 𐴀𐴦𐴝𐴔 𐴂𐴝𐴂𐴓𐴞𐴑 𐴐𐴡𐴇𐴞𐴊 𐴀𐴡𐴘𐴧𐴠| 𐴀𐴞𐴕𐴧𐴝 𐴓𐴞𐴓𐴧𐴝𐴇𐴞 𐴖𐴝 𐴀𐴞𐴕𐴧𐴝𐴦 𐴀𐴞𐴓𐴝𐴘𐴇𐴞 𐴌𐴝𐴅𐴞𐴀𐴟𐴕| 𐴀𐴝𐴌 𐴀𐴦𐴝𐴔 𐴂𐴝𐴂𐴓𐴞𐴑 𐴀𐴦𐴡𐴓 𐴋𐴡𐴌𐴡𐴌 𐴔𐴝𐴎𐴠 𐴊𐴞𐴕 𐴈𐴝𐴣𐴋𐴝𐴌| 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴓𐴞𐴔 𐴀𐴦𐴡𐴓 𐴕𐴞𐴎𐴡𐴌𐴝𐴌 𐴈𐴡𐴕𐴡 𐴎𐴞𐴔𐴧𐴝𐴊𐴝𐴌 𐴕𐴝𐴘 𐴁𐴡𐴓𐴞 𐴁𐴟𐴎𐴠| 𐴋𐴡𐴌𐴢, 𐴔𐴟𐴏𐴞𐴁𐴡𐴃, 𐴂𐴠𐴌𐴠𐴐𐴝𐴕𐴞 𐴒𐴡𐴌 - 𐴁𐴝𐴌𐴞 𐴏𐴥𐴝𐴌𐴞 𐴀𐴝𐴙𐴐𐴧𐴠𐴊𐴞 𐴌𐴟𐴇𐴝𐴙𐴚𐴒𐴙𐴝 𐴀𐴦𐴡𐴓𐴡𐴌 𐴉𐴞𐴏𐴟 𐴕𐴡 𐴏𐴥𐴝𐴌𐴠| 𐴇𐴝𐴏𐴁𐴟𐴕𐴝 𐴓𐴧𐴝𐴇𐴟 𐴖𐴝 𐴕𐴞𐴀𐴔𐴝𐴓𐴢 𐴖𐴝𐴑𐴞𐴓| 𐴁𐴠𐴐𐴥𐴡𐴑 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴀𐴞 𐴊𐴟𐴈 𐴀𐴝𐴊𐴧𐴠 𐴔𐴟𐴏𐴞𐴁𐴡𐴃 𐴀𐴝𐴣𐴀𐴌𐴝𐴌 𐴊𐴞𐴓𐴡𐴌𐴠 𐴘𐴥𐴡 𐴎𐴡𐴈𐴡𐴕 𐴒𐴡𐴌𐴠 𐴉𐴠𐴓𐴝𐴘𐴧𐴠| 𐴀𐴝𐴣𐴀𐴌𐴝𐴌𐴠 𐴘𐴥𐴡 𐴂𐴠𐴌𐴠𐴐𐴥𐴝𐴕𐴞 𐴒𐴡𐴌𐴞 𐴉𐴠𐴓𐴝𐴘𐴧𐴠| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴃𐴦𐴝𐴔𐴝𐴔 𐴌𐴡𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴀𐴝𐴊𐴧𐴠 𐴁𐴝𐴚𐴓𐴝𐴊𐴠𐴐𐴡𐴌 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴓𐴧𐴝 𐴑𐴞𐴏𐴧𐴟 𐴕𐴡𐴏𐴞𐴇𐴡𐴃 𐴂𐴠𐴐 𐴒𐴡𐴙𐴃𐴧𐴥𐴤𐴡 𐴏𐴝𐴛-

𐴱- 𐴕𐴞𐴎𐴡𐴌𐴝𐴌 𐴊𐴡𐴌𐴔𐴞𐴘𐴝𐴕 𐴇𐴥𐴝𐴔𐴓𐴝 𐴒𐴡𐴌𐴡𐴕𐴡𐴌 𐴏𐴞𐴕𐴃𐴝 𐴁𐴝𐴉𐴕𐴝𐴌𐴠 𐴊𐴟𐴌 𐴒𐴡𐴌𐴡𐴕

𐴁𐴠𐴐𐴥𐴡𐴑 𐴀𐴞𐴙 𐴉𐴠𐴃𐴕𐴝𐴌 𐴎𐴡𐴔𐴝𐴕𐴝𐴃 𐴔𐴟𐴏𐴡𐴓𐴔𐴝𐴕 𐴀𐴦𐴡𐴓 𐴉𐴞𐴑𐴇𐴥𐴞 ,𐴏𐴞𐴕𐴃𐴝- 𐴁𐴝𐴉𐴕𐴝 𐴀𐴝𐴊𐴧𐴠 𐴀𐴝𐴑𐴞𐴊𐴝𐴌 𐴁𐴝𐴁𐴡𐴃𐴠  𐴁𐴦𐴡𐴃 𐴋𐴡𐴙𐴓𐴧𐴝 𐴉𐴡𐴌𐴡𐴑𐴡𐴃 𐴃𐴡𐴉𐴌𐴞𐴑 𐴀𐴡𐴘 𐴒𐴞𐴘𐴡𐴘| 𐴀𐴝𐴣𐴀𐴌𐴝 𐴃𐴦𐴝𐴔𐴔 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴏𐴝𐴣𐴀𐴃𐴠 𐴓𐴡𐴘 𐴆𐴡𐴓𐴡𐴕 𐴊𐴡𐴌𐴈𐴝𐴌| 𐴐𐴟𐴊𐴟 𐴅𐴡𐴔𐴝𐴃 𐴀𐴝𐴊𐴧𐴠 𐴃𐴡𐴕𐴅𐴞𐴔 𐴀𐴡𐴃𐴡𐴁𐴝 𐴏𐴡𐴣𐴋𐴡 𐴏𐴡𐴣𐴋𐴡 𐴀𐴠𐴈𐴃𐴠𐴓𐴝𐴉𐴡𐴌 𐴎𐴡𐴌𐴞𐴘𐴝 𐴀𐴡𐴙𐴕𐴧𐴡 𐴔𐴟𐴏𐴡𐴓𐴔𐴝𐴕𐴡𐴌 𐴏𐴝𐴣𐴀𐴃𐴠 𐴊𐴟𐴐𐴧𐴝𐴕𐴞 𐴒𐴡𐴌𐴝 𐴕𐴡 𐴎𐴝𐴘𐴁𐴡| 𐴇𐴥𐴝𐴌 𐴑𐴞𐴏𐴞𐴙𐴔𐴧𐴝 𐴀𐴞𐴈𐴃𐴞𐴓𐴝𐴉 𐴀𐴝𐴊𐴧𐴠 𐴉𐴡𐴌𐴡𐴑𐴡𐴌 𐴁𐴦𐴝𐴊 𐴊𐴞  𐴀𐴝𐴣𐴀𐴌𐴝𐴌 𐴁𐴠𐴒𐴧𐴟𐴕𐴡𐴌𐴠  𐴀𐴝𐴣𐴀𐴌𐴝𐴌 𐴀𐴝𐴏𐴡𐴓 𐴔𐴡𐴑𐴏𐴟𐴊𐴡𐴌 𐴖𐴝𐴌𐴠 𐴅𐴡𐴔𐴝 𐴀𐴡𐴀𐴕 𐴉𐴡𐴌𐴞𐴁𐴡| 𐴀𐴝𐴣𐴀𐴌𐴝 𐴇𐴞𐴙 𐴔𐴡𐴑𐴏𐴟𐴊 𐴀𐴡𐴘𐴓𐴊𐴠 𐴀𐴝𐴌𐴑𐴝𐴕𐴡𐴌𐴠 𐴁𐴤𐴝𐴌𐴞𐴏 𐴁𐴟𐴊𐴧𐴞𐴏 𐴀𐴦𐴡𐴓𐴡𐴌 𐴇𐴥𐴝𐴃𐴡𐴃𐴧𐴟𐴕 𐴀𐴝𐴎𐴝𐴊 𐴒𐴡𐴌𐴠 𐴀𐴝𐴌𐴑𐴝𐴕𐴡𐴃 𐴐𐴡𐴌𐴞𐴀𐴝𐴃𐴡𐴌 𐴕𐴞𐴎𐴝𐴔𐴡𐴌𐴠 𐴑𐴝𐴀𐴠𐴔 𐴒𐴡𐴌𐴡𐴕| 𐴎𐴠 𐴁𐴤𐴝𐴘𐴧𐴝𐴕𐴠 𐴐𐴡𐴌𐴞𐴀𐴝𐴃 𐴑𐴝𐴀𐴠𐴔𐴡𐴌 𐴈𐴝𐴔 𐴒𐴡𐴌𐴠𐴌 𐴈𐴡𐴕𐴡𐴁𐴝𐴉𐴠 𐴃𐴝𐴌𐴝𐴌 𐴔𐴟𐴈𐴝𐴓𐴠𐴉𐴞 𐴒𐴡𐴌𐴝 𐴕𐴡 𐴎𐴝𐴘𐴁𐴡| 𐴃𐴡𐴘 𐴇𐴞𐴃𐴠  𐴀𐴝𐴣𐴀𐴌 𐴃𐴝𐴕𐴅𐴞𐴔𐴡𐴌 𐴔𐴝𐴕𐴟𐴙𐴐𐴥 𐴀𐴡𐴗𐴑 𐴀𐴡𐴃𐴡𐴁𐴝 𐴀𐴡𐴙𐴕𐴧𐴡 𐴈𐴡𐴕𐴡 𐴃𐴝𐴕𐴅𐴞𐴔𐴡 𐴔𐴝𐴕𐴟𐴙𐴐𐴥 𐴘𐴦𐴝 𐴃𐴡 𐴃𐴝𐴀𐴞𐴊 𐴒𐴡𐴌𐴡𐴘𐴧𐴝 𐴀𐴡𐴗𐴑| 𐴐𐴟𐴊𐴟 𐴀𐴝𐴣𐴀𐴌 𐴃𐴝𐴕𐴅𐴞𐴔 𐴃𐴝𐴑𐴞𐴁𐴡 𐴀𐴝𐴌 𐴀𐴡𐴙𐴕𐴧𐴡 𐴈𐴡𐴕𐴡 𐴃𐴝𐴕𐴅𐴞𐴔 𐴃𐴝𐴑𐴞𐴃 𐴕𐴡 𐴉𐴝𐴌𐴞𐴁𐴡 𐴀𐴞 𐴏𐴞𐴕𐴃𐴝 𐴀𐴝𐴣𐴀𐴌𐴝𐴌 𐴔𐴝𐴃𐴝𐴃𐴧𐴟𐴕 𐴊𐴟𐴌 𐴒𐴡𐴌𐴞 𐴉𐴠𐴓𐴝𐴕 𐴉𐴡𐴌𐴞𐴁𐴡| 𐴀𐴝𐴀𐴛 𐴎𐴞𐴕𐴋𐴞𐴙𐴓𐴧𐴝 𐴀𐴝𐴣𐴀𐴌 𐴃𐴝𐴕𐴅𐴞𐴔𐴡𐴌 𐴁𐴤𐴝𐴘𐴧𐴝𐴕𐴊𐴡𐴌𐴠 𐴔𐴡𐴇𐴝𐴁𐴧𐴝𐴃 𐴒𐴡𐴌𐴞 𐴇𐴠𐴕𐴋𐴞𐴙𐴓𐴧𐴝 𐴀𐴡𐴙𐴕𐴧𐴡 𐴃𐴝𐴕𐴅𐴞𐴔𐴡𐴌 𐴁𐴤𐴝𐴘𐴧𐴝𐴕𐴊𐴡𐴌𐴠 𐴘𐴥𐴡 𐴔𐴡𐴇𐴝𐴁𐴧𐴝𐴃 𐴒𐴡𐴌𐴝 𐴉𐴡𐴌𐴞𐴁𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞  𐴀𐴝𐴓𐴧𐴝𐴤 𐴃𐴝𐴓𐴝𐴌 𐴌𐴝𐴏𐴧𐴝𐴃 𐴈𐴝𐴔 𐴒𐴡𐴌𐴡𐴘𐴧𐴝 𐴈𐴡𐴕𐴞𐴑𐴧𐴝𐴌𐴠 𐴃𐴝𐴌 𐴈𐴝𐴔𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴞𐴁𐴝𐴌 𐴀𐴝𐴊𐴞𐴑𐴝𐴌 𐴀𐴝𐴓𐴧𐴝𐴤 𐴃𐴝𐴓𐴝 𐴀𐴡𐴕𐴡𐴌𐴠 𐴕𐴡 𐴊𐴠𐴘| 𐴀𐴝𐴣𐴀𐴌𐴝𐴌 𐴔𐴝𐴎𐴠𐴌 𐴃𐴡𐴕𐴅𐴞𐴔𐴞 𐴘𐴦𐴝 𐴃𐴡 𐴅𐴡𐴔𐴝𐴃𐴞 𐴃𐴝𐴉𐴡𐴌𐴧𐴟𐴑𐴡𐴌 𐴈𐴡𐴕𐴡 𐴉𐴝𐴀𐴞𐴊𐴝 𐴀𐴝𐴣𐴀𐴌𐴝𐴌 𐴊𐴟𐴐𐴧𐴝𐴕 𐴀𐴦𐴡𐴓𐴠 𐴕𐴡 𐴓𐴡𐴙𐴃𐴡 𐴉𐴝𐴌𐴠 𐴇𐴠𐴊𐴞𐴑 𐴈𐴦𐴝𐴏 𐴁𐴝𐴉𐴠 𐴀𐴝𐴣𐴀𐴌𐴝𐴌 𐴈𐴠𐴘𐴝𐴓 𐴌𐴝𐴑𐴡𐴌𐴕 𐴉𐴡𐴌𐴞𐴁𐴡|𐴱

𐴲- 𐴕𐴞𐴎𐴡𐴌𐴝𐴌 𐴊𐴡𐴌𐴔𐴞𐴘𐴝𐴕𐴞 𐴉𐴡𐴌𐴡𐴑 𐴀𐴝𐴊𐴧𐴠  𐴁𐴠𐴑𐴝𐴕𐴟𐴕𐴞 𐴔𐴝𐴌𐴝𐴔𐴝𐴌𐴞 𐴁𐴡𐴕 𐴒𐴡𐴌𐴡𐴕

𐴀𐴠𐴑𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴓𐴡𐴖𐴡𐴌 𐴊𐴝𐴔 𐴉𐴟𐴌𐴝 𐴊𐴟𐴕𐴞𐴘𐴝𐴃𐴧𐴟𐴕 𐴘𐴥𐴡 𐴁𐴠𐴐𐴥𐴞| 𐴑𐴟𐴌𐴀𐴦𐴝𐴕 𐴀𐴝𐴊𐴧𐴠 𐴇𐴝𐴊𐴞𐴏𐴡𐴌 𐴔𐴧𐴝𐴎𐴠 𐴔𐴟𐴏𐴡𐴓𐴔𐴝𐴕𐴡𐴌 𐴓𐴡𐴖𐴡𐴌𐴠 𐴀𐴝𐴊𐴧𐴠 𐴀𐴞𐴅𐴧𐴡𐴃𐴡𐴌𐴠 𐴇𐴠𐴉𐴝𐴎𐴡𐴃 𐴒𐴡𐴌𐴡𐴕𐴡𐴌 𐴏𐴡𐴈𐴃𐴡 𐴃𐴝𐴑𐴞𐴊 𐴀𐴝𐴙𐴐𐴧𐴠| 𐴁𐴠𐴑𐴝𐴕𐴟𐴕𐴞 𐴁𐴝𐴉𐴠 𐴔𐴝𐴌𐴝𐴔𐴝𐴌𐴞 𐴒𐴡𐴌𐴝, 𐴀𐴠𐴑𐴎𐴡𐴕𐴠 𐴀𐴝𐴌𐴠𐴑𐴎𐴡𐴕𐴡𐴌𐴠 𐴁𐴠𐴅𐴧𐴡𐴃𐴞 𐴒𐴡𐴌𐴝𐴌 𐴔𐴟𐴌 𐴊𐴥𐴡𐴔𐴑𐴞 𐴀𐴝𐴙𐴐𐴧𐴠| 𐴁𐴠𐴑𐴝𐴕𐴟𐴕𐴞 𐴁𐴝𐴉𐴠 𐴀𐴠𐴑𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌𐴠 𐴑𐴡𐴃𐴡𐴓 𐴒𐴡𐴌𐴝 𐴉𐴟𐴌𐴝 𐴊𐴟𐴕𐴞𐴘𐴝𐴌 𐴔𐴝𐴕𐴟𐴐𐴡𐴌𐴠 𐴑𐴡𐴃𐴡𐴓 𐴒𐴡𐴌𐴝𐴌 𐴁𐴡𐴌𐴝𐴁𐴡𐴌| 𐴑𐴞𐴕𐴃𐴟 𐴀𐴝𐴉𐴏𐴡𐴏𐴡𐴌 𐴈𐴡𐴃𐴝 𐴀𐴡𐴘𐴓𐴊𐴠 𐴑𐴞 𐴀𐴞𐴘𐴦𐴝𐴌 𐴁𐴦𐴝𐴊𐴠𐴘𐴥𐴡  𐴀𐴝𐴣𐴀𐴌𐴝 𐴏𐴡𐴣𐴋𐴡 𐴏𐴡𐴣𐴋𐴡 𐴏𐴦𐴞𐴏 𐴕𐴞𐴎𐴡𐴌𐴝𐴌 𐴔𐴧𐴝𐴎𐴠 𐴈𐴝𐴙𐴎𐴧𐴝 𐴀𐴝𐴊𐴧𐴠 𐴑𐴡𐴃𐴡𐴓𐴡𐴌 𐴋𐴡𐴙𐴓𐴧𐴝 𐴋𐴡𐴣𐴀𐴌 𐴋𐴡𐴣𐴀𐴌 𐴈𐴡𐴏𐴟𐴌𐴞 𐴔𐴧𐴝𐴎𐴠 𐴐𐴝𐴔𐴞𐴓 𐴀𐴡𐴘 𐴎𐴝𐴘| 𐴀𐴡 𐴀𐴝𐴣𐴀𐴌𐴝𐴌 𐴔𐴟𐴏𐴡𐴓𐴔𐴝𐴕 𐴁𐴤𐴝𐴘𐴧𐴝𐴕!  𐴀𐴝𐴓𐴧𐴝𐴤 𐴃𐴝𐴓𐴝𐴌 𐴈𐴡𐴃𐴝𐴌𐴠 𐴘𐴦𐴝𐴊 𐴒𐴡𐴌𐴡! 𐴀𐴝𐴓𐴧𐴝𐴤 𐴃𐴝𐴓𐴝 𐴘𐴠 𐴈𐴡𐴘𐴧𐴠𐴊𐴠 - "𐴃𐴟𐴖𐴝𐴣𐴌𐴝 𐴁𐴠𐴒𐴧𐴟𐴕𐴠 𐴀𐴝𐴓𐴧𐴝𐴤 𐴃𐴝𐴓𐴝𐴌  𐴌𐴡𐴏𐴥𐴞 𐴌𐴠 𐴔𐴡𐴎𐴁𐴟𐴃 𐴒𐴡𐴌𐴞 𐴂𐴝𐴑𐴌𐴥𐴡 𐴀𐴝𐴌 𐴃𐴟𐴖𐴝𐴣𐴌𐴝 𐴉𐴡𐴌𐴡𐴑 𐴕𐴡 𐴀𐴡𐴘𐴧𐴡|" 𐴀𐴝𐴌 𐴀𐴝𐴣𐴀𐴌𐴝𐴌 𐴇𐴝𐴓𐴡𐴃 𐴀𐴡𐴘𐴓𐴊𐴠 𐴑𐴞 𐴀𐴠𐴑𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌𐴠, 𐴀𐴠𐴑𐴎𐴡𐴕 𐴀𐴝𐴓𐴠𐴔𐴡𐴌𐴠 𐴔𐴝𐴌𐴞 𐴉𐴠𐴓𐴝𐴘𐴥𐴡𐴃 𐴘𐴥𐴡 𐴀𐴝𐴣𐴀𐴌𐴝𐴌 𐴇𐴥𐴝𐴃 𐴕𐴡 𐴑𐴝𐴣𐴉𐴠| 𐴀𐴡 𐴔𐴟𐴏𐴡𐴓𐴔𐴝𐴕 𐴁𐴝𐴤𐴘𐴧𐴝𐴕! 𐴀𐴡𐴕𐴡 𐴀𐴡𐴕𐴡𐴌 𐴇𐴥𐴝𐴌 𐴈𐴝𐴔𐴡𐴌 𐴁𐴝𐴁𐴡𐴃𐴠 𐴀𐴝𐴓𐴧𐴝𐴤 𐴃𐴝𐴓𐴝𐴌𐴠 𐴋𐴡𐴌𐴝𐴖! 𐴁𐴠𐴑𐴝𐴕𐴟𐴕𐴞 𐴁𐴝𐴉𐴠 𐴈𐴡𐴕𐴞𐴑𐴧𐴝𐴌𐴠 𐴔𐴝𐴌𐴝𐴃𐴧𐴟𐴕 𐴁𐴝𐴏𐴞  𐴃𐴝𐴑𐴡!  𐴐𐴝𐴘𐴈𐴢 𐴀𐴝𐴃𐴞 𐴀𐴟𐴓𐴧𐴝𐴤 𐴓𐴞𐴁𐴧𐴞 (𐴌𐴡𐴇𐴞𐴔𐴝𐴇𐴟𐴓𐴧𐴝𐴤)𐴀𐴡𐴌 𐴇𐴠𐴙 𐴃𐴝𐴌𐴞𐴈𐴞 𐴓𐴠𐴑𐴆𐴝𐴌𐴡𐴌𐴞 𐴀𐴡𐴕𐴡𐴌 𐴊𐴠𐴔𐴝𐴒𐴡𐴃 𐴏𐴠𐴄 𐴒𐴡𐴌𐴞 𐴓𐴡𐴖| 𐴃𐴝𐴀𐴛 𐴈𐴡𐴘𐴧𐴠𐴊𐴠- 𐴊𐴟𐴕𐴞𐴘𐴝 𐴇𐴝𐴓𐴝𐴑 𐴀𐴡𐴘 𐴅𐴝𐴗𐴒𐴧𐴡𐴘, 𐴇𐴝𐴓𐴝𐴑 𐴀𐴡𐴘 𐴅𐴝𐴗𐴒𐴧𐴡𐴘 𐴀𐴝𐴀𐴣𐴌𐴝𐴌 𐴃𐴡𐴕𐴅𐴞𐴔, 𐴇𐴝𐴓𐴝𐴑 𐴀𐴡𐴘 𐴎𐴝𐴘𐴧𐴟𐴔 𐴀𐴝𐴣𐴀𐴌𐴝| 𐴀𐴞𐴘𐴦𐴝𐴌 𐴁𐴦𐴝𐴊𐴠𐴘𐴥𐴡  𐴁𐴠𐴑𐴝𐴕𐴟𐴕𐴞 𐴁𐴝𐴉𐴠  𐴀𐴝𐴣𐴀𐴌𐴝𐴌 𐴇𐴥𐴝𐴃𐴡𐴃 𐴈𐴡𐴕𐴡 𐴔𐴟𐴏𐴡𐴓𐴔𐴝𐴕𐴡𐴌 𐴓𐴡𐴖 𐴕𐴡 𐴕𐴠𐴀𐴠𐴓𐴠| 𐴀𐴡 𐴔𐴟𐴇𐴝𐴁𐴧𐴝𐴃𐴡𐴌 𐴁𐴝𐴘𐴧𐴝𐴕! 𐴊𐴞𐴕 𐴑𐴝𐴀𐴠𐴔𐴡𐴌 𐴇𐴥𐴝𐴌 𐴇𐴥𐴡𐴑 𐴃𐴡𐴕𐴅𐴞𐴔𐴡𐴌𐴠  𐴔𐴝𐴕𐴞 𐴓𐴡𐴀𐴕𐴡𐴌 𐴔𐴠𐴎𐴝𐴎 𐴃𐴡𐴘𐴧𐴝𐴌 𐴒𐴡𐴌𐴡|

𐴳-  𐴀𐴦𐴝𐴂 𐴔𐴟𐴏𐴡𐴓𐴔𐴝𐴕𐴡𐴌 𐴃𐴝𐴓𐴞𐴔 𐴀𐴝𐴊𐴧𐴠 𐴃𐴡𐴌𐴁𐴞𐴘𐴝𐴃𐴡𐴌 𐴁𐴝𐴁𐴡𐴃𐴠 𐴔𐴠𐴇𐴕𐴡𐴃 𐴒𐴡𐴌𐴡𐴕

𐴁𐴦𐴡𐴃 𐴁𐴡𐴏𐴡𐴌 𐴓𐴡𐴃𐴞 𐴓𐴝𐴒𐴝𐴃𐴝𐴌 𐴎𐴟𐴓𐴟𐴔, 𐴔𐴡𐴏𐴞𐴁𐴡𐴃 𐴀𐴝𐴌 𐴅𐴠𐴕𐴞𐴏𐴝𐴙𐴋𐴡𐴌 𐴐𐴞𐴑𐴝𐴌 𐴀𐴡𐴀𐴕𐴡𐴌 𐴎𐴡𐴌𐴞𐴘𐴝 𐴌𐴡𐴇𐴞𐴙𐴚𐴒𐴙𐴝 𐴔𐴟𐴏𐴡𐴓𐴝𐴔 𐴀𐴦𐴡𐴓 𐴀𐴞𐴕𐴏𐴝𐴕𐴞 𐴇𐴥𐴡𐴑𐴡𐴃𐴧𐴟𐴕 𐴔𐴝𐴇𐴌𐴟𐴔 𐴀𐴝𐴏𐴠| 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴀𐴠𐴑𐴧𐴝𐴕 𐴀𐴝𐴇𐴝𐴔 𐴏𐴦𐴞𐴕 𐴀𐴡𐴘𐴓𐴊𐴠 𐴊𐴞𐴕𐴞 𐴀𐴝𐴊𐴧𐴠 𐴊𐴟𐴕𐴞𐴘𐴝𐴁𐴞 𐴃𐴝𐴓𐴞𐴔 𐴃𐴡𐴌𐴁𐴞𐴘𐴝𐴃 𐴐𐴞𐴑𐴡𐴕| 𐴌𐴡𐴇𐴞𐴙𐴚𐴒𐴙𐴝 𐴌𐴞𐴉𐴟𐴌𐴞 𐴑𐴠𐴀𐴔𐴡𐴃 𐴀𐴝𐴊𐴧𐴠  𐴁𐴦𐴡𐴃 𐴊𐴠𐴐𐴥𐴡𐴃 𐴀𐴝𐴏𐴠𐴊𐴞 𐴌𐴡𐴇𐴞𐴙𐴚𐴒𐴙𐴝 𐴀𐴦𐴡𐴓𐴡𐴌𐴠 𐴀𐴞𐴓𐴡𐴔 𐴐𐴞𐴑𐴝𐴕𐴡 𐴀𐴝𐴊𐴧𐴠 𐴁𐴦𐴡𐴃 𐴋𐴦𐴡𐴙𐴓𐴧𐴝 𐴃𐴡𐴌𐴞𐴘𐴡𐴃 𐴊𐴠 𐴃𐴝𐴌𐴝𐴌𐴠 𐴀𐴝𐴑𐴡𐴓𐴁𐴡𐴕 𐴒𐴡𐴌𐴝 𐴊𐴡𐴌𐴈𐴝𐴌| 𐴌𐴡𐴇𐴞𐴙𐴚𐴒𐴙𐴝 𐴃𐴝𐴔𐴝𐴔 𐴓𐴞𐴋𐴝𐴌 𐴀𐴥𐴡𐴑𐴧𐴡𐴓 𐴀𐴝𐴊𐴧𐴠 𐴀𐴡𐴙𐴕𐴧𐴡 𐴀𐴡𐴙𐴕𐴧𐴡 𐴀𐴝𐴈𐴡𐴓𐴁𐴡𐴕 𐴔𐴝𐴕𐴟𐴙𐴐𐴥𐴡𐴌𐴠 𐴀𐴞 𐴈𐴝𐴔𐴡𐴃 𐴐𐴝𐴔𐴞𐴓 𐴀𐴡𐴀𐴕𐴡𐴌 𐴓𐴧𐴝 𐴀𐴝𐴣𐴀𐴌𐴝 𐴏𐴡𐴈𐴃𐴡 𐴁𐴝𐴉𐴠 𐴕𐴡𐴏𐴞𐴇𐴡𐴃 𐴒𐴡𐴌𐴞| 𐴁𐴠𐴐𐴥𐴡𐴑 𐴀𐴟𐴒𐴧𐴗𐴝 𐴉𐴡𐴕𐴧𐴝𐴀𐴦𐴡𐴓𐴝 𐴎𐴝𐴃𐴞 𐴃𐴝𐴌𐴝𐴌 𐴊𐴟𐴐𐴧𐴝𐴕𐴡𐴃𐴧𐴟𐴕 𐴓𐴡𐴌𐴝𐴘 𐴒𐴡𐴌𐴞 𐴎𐴞𐴙𐴃𐴧𐴡 𐴉𐴝𐴌𐴠|𐴱

𐴴- 𐴁𐴤𐴝𐴌𐴔𐴞𐴏 𐴔𐴠𐴓𐴠𐴄𐴠𐴌𐴞 𐴀𐴝𐴊𐴧𐴠 𐴀𐴠𐴕𐴃𐴠𐴎𐴝𐴔 𐴒𐴡𐴌𐴡𐴘𐴧𐴝 𐴀𐴦𐴡𐴓 𐴀𐴡𐴘𐴓𐴊𐴠 𐴀𐴝𐴣𐴀𐴌𐴝𐴌 𐴔𐴠𐴙𐴕 𐴊𐴟𐴐𐴧𐴝𐴕

𐴁𐴥𐴝𐴌𐴔𐴞𐴏 𐴔𐴠𐴓𐴠𐴄𐴠𐴌𐴞 𐴀𐴝𐴊𐴧𐴠 𐴀𐴠𐴕𐴃𐴞𐴎𐴝𐴔 𐴒𐴡𐴌𐴡𐴘𐴧𐴝 𐴀𐴦𐴡𐴓 𐴀𐴡𐴘𐴓𐴊𐴠 𐴀𐴡𐴕𐴡𐴌𐴝𐴌 𐴀𐴝𐴏𐴡𐴓 𐴄𐴥𐴝𐴌𐴒𐴠𐴄| 𐴃𐴝𐴌𐴝𐴌 𐴈𐴠𐴓𐴝𐴉 𐴀𐴡𐴕𐴡𐴌𐴝𐴌 𐴓𐴡𐴌𐴝𐴘| 𐴁𐴞𐴏𐴠𐴐 𐴒𐴡𐴌𐴞 𐴀𐴞 𐴀𐴥𐴡𐴑𐴧𐴡𐴃𐴡 𐴔𐴧𐴝𐴎𐴠 𐴃𐴝𐴌𐴝𐴌𐴠 𐴄𐴥𐴝𐴌𐴒𐴠𐴄 𐴒𐴡𐴌𐴝  𐴀𐴝𐴒𐴠𐴃𐴧𐴟𐴕 𐴀𐴝𐴌𐴘𐴥𐴡 𐴀𐴦𐴝𐴏𐴝𐴕 𐴀𐴡𐴘𐴁𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴀𐴠𐴈𐴡𐴕 𐴃𐴝𐴌𐴝 𐴀𐴦𐴝𐴂𐴡𐴏𐴦𐴡 𐴔𐴧𐴝𐴎𐴠 𐴉𐴡𐴌𐴡𐴑 𐴀𐴡𐴘 𐴒𐴞𐴘𐴡𐴘| 𐴃𐴝𐴌𐴝𐴌 𐴀𐴦𐴝𐴔 𐴔𐴝𐴕𐴟𐴐𐴥𐴠 𐴔𐴠𐴓𐴠𐴄𐴠𐴌𐴞𐴌 𐴈𐴠𐴓𐴝𐴉 𐴓𐴡𐴌𐴝𐴘 𐴒𐴡𐴌𐴠𐴌| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴀𐴝𐴓𐴧𐴝𐴤 𐴃𐴝𐴓𐴝 𐴀𐴡𐴕𐴡𐴌𐴝𐴌𐴠 𐴎𐴠 𐴔𐴡𐴖𐴑𐴝 𐴊𐴞𐴘𐴧𐴠 𐴇𐴞𐴘𐴝𐴕𐴡𐴌𐴠 𐴈𐴦𐴝𐴔 𐴀𐴠𐴏𐴃𐴠𐴓𐴝𐴔 𐴒𐴡𐴌𐴝 𐴊𐴡𐴌𐴈𐴝𐴌𐴢|𐴱

𐴵- 𐴁𐴝𐴚𐴓𐴝𐴊𐴠𐴐𐴡𐴌 𐴀𐴦𐴝𐴔 𐴔𐴝𐴕𐴟𐴙𐴐𐴥 𐴀𐴝𐴊𐴧𐴠 𐴀𐴠𐴕𐴃𐴠𐴎𐴝𐴔 𐴒𐴡𐴌𐴡𐴘𐴧𐴝 𐴀𐴥𐴡𐴑𐴧𐴡𐴓𐴡𐴌 𐴏𐴝𐴣𐴀𐴃𐴠 𐴔𐴡𐴈𐴝𐴓𐴠𐴉𐴞 𐴒𐴡𐴌𐴝𐴃𐴧𐴟𐴕 𐴁𐴝𐴏𐴥𐴞 𐴃𐴝𐴑𐴡𐴕

𐴁𐴠𐴐𐴥𐴡𐴑 𐴁𐴝𐴚𐴓𐴝𐴊𐴠𐴐𐴥𐴡𐴌 𐴀𐴦𐴝𐴔 𐴔𐴟𐴏𐴡𐴓𐴔𐴝𐴕 𐴀𐴝𐴊𐴧𐴠 𐴀𐴡𐴓𐴝𐴔𐴝𐴘𐴠 𐴑𐴠𐴌𐴝𐴔 𐴀𐴝𐴊𐴧𐴠 𐴊𐴞𐴕𐴊𐴝𐴌 𐴔𐴝𐴕𐴟𐴐𐴥𐴠 𐴀𐴡𐴕𐴡𐴌𐴝𐴌𐴠 𐴀𐴡𐴕𐴡𐴌𐴝𐴌 𐴔𐴡𐴏𐴞𐴁𐴡𐴌𐴡 𐴀𐴥𐴡𐴑𐴃𐴡𐴃 𐴔𐴡𐴊𐴡𐴊 𐴒𐴡𐴙𐴅𐴧𐴠| 𐴀𐴡𐴕𐴡𐴌𐴝𐴌𐴠 𐴅𐴝𐴕 𐴀𐴝𐴊𐴧𐴠 𐴔𐴝𐴓 𐴊𐴞  𐴔𐴡𐴊𐴡𐴊 𐴒𐴡𐴙𐴅𐴧𐴠| 𐴀𐴡𐴕𐴡𐴌𐴝𐴌 𐴔𐴡𐴏𐴞𐴁𐴡𐴃𐴡𐴌𐴠 𐴕𐴞𐴎𐴡𐴌 𐴔𐴡𐴏𐴞𐴁𐴡𐴃 𐴁𐴡𐴓𐴞 𐴁𐴟𐴙𐴎𐴧𐴠| 𐴀𐴡𐴕𐴡𐴌𐴝𐴌 𐴊𐴟𐴈𐴡𐴃 𐴀𐴝𐴕𐴏𐴝𐴌𐴡𐴌 𐴈𐴝𐴔 𐴒𐴡𐴙𐴅𐴧𐴠| 𐴀𐴡𐴕𐴡𐴌 𐴖𐴝𐴌𐴠 𐴎𐴡𐴌𐴟𐴌𐴞 𐴑𐴞 𐴃𐴝𐴌𐴝𐴌 𐴀𐴞 𐴈𐴝𐴔𐴡𐴌𐴓𐴧𐴝 𐴃𐴝𐴌𐴝𐴌 𐴐𐴟𐴑𐴌𐴞𐴘𐴝 𐴀𐴝𐴊𐴝𐴘 𐴒𐴡𐴌𐴝| 𐴀𐴠𐴀𐴕 𐴑𐴞 𐴁𐴝𐴚𐴓𐴝𐴊𐴠𐴐𐴡𐴌 𐴀𐴠𐴕𐴃𐴠𐴎𐴝𐴔 𐴒𐴡𐴌𐴡𐴘𐴧𐴝 𐴀𐴦𐴡𐴓𐴡𐴌 𐴏𐴝𐴣𐴀𐴃𐴠 𐴇𐴥𐴝𐴌 𐴑𐴞𐴏𐴞𐴙𐴔𐴧𐴝 𐴔𐴝𐴌𐴝𐴔𐴝𐴌𐴞 -𐴈𐴝𐴙𐴅𐴧𐴝𐴃𐴧𐴟𐴕 𐴁𐴝𐴏𐴥𐴞 𐴃𐴝𐴑𐴡𐴕| 𐴓𐴟𐴄𐴂𐴝𐴄, 𐴆𐴝𐴊𐴝 𐴓𐴡𐴀𐴕, 𐴕𐴞𐴎𐴡𐴌 𐴃𐴝𐴑𐴡𐴃 𐴎𐴡𐴇𐴠𐴌 𐴒𐴡𐴌𐴡𐴕 𐴏𐴡𐴀𐴡  𐴀𐴡𐴙𐴕𐴧𐴡 𐴎𐴡𐴃𐴡 𐴑𐴞𐴏𐴞𐴙𐴔𐴧𐴝 𐴃𐴡𐴌𐴞𐴑𐴝𐴃 𐴀𐴦𐴝𐴔 𐴂𐴝𐴂𐴓𐴞𐴑𐴡𐴌𐴠 𐴂𐴠𐴌𐴠𐴐𐴝𐴕𐴞 𐴒𐴡𐴌𐴡𐴘𐴧𐴝 𐴇𐴝𐴣𐴃𐴞𐴘𐴝𐴌 𐴀𐴦𐴡𐴓𐴝 𐴀𐴝𐴃𐴡𐴚𐴁𐴝𐴊𐴞 𐴃𐴡𐴕𐴅𐴞𐴔 𐴀𐴝𐴏𐴠 𐴃𐴝𐴌𐴝𐴌 𐴉𐴟𐴌𐴝𐴉𐴟𐴌𐴞 𐴁𐴡𐴕 𐴒𐴡𐴌𐴞 𐴊𐴠𐴀𐴕 𐴉𐴡𐴌𐴞𐴁𐴡| 𐴀𐴡𐴕𐴡𐴌 𐴓𐴧𐴝 𐴁𐴝𐴚𐴓𐴝𐴊𐴠𐴐𐴡𐴌 𐴔𐴟𐴏𐴡𐴓𐴔𐴝𐴕 𐴀𐴦𐴡𐴓𐴡𐴌 𐴎𐴠 𐴔𐴟𐴇𐴝𐴁𐴧𐴡𐴃 𐴀𐴝𐴊𐴧𐴠 𐴀𐴝𐴊𐴡𐴌 𐴀𐴝𐴏𐴠  𐴇𐴞𐴘𐴝𐴌 𐴎𐴡𐴌𐴞𐴘𐴝 𐴀𐴡𐴕𐴡𐴌𐴝𐴌 𐴕𐴞𐴎 𐴊𐴠𐴐𐴡𐴃 𐴐𐴡𐴌𐴞𐴀𐴝𐴃 𐴑𐴝𐴀𐴠𐴔𐴡𐴌 𐴀𐴟𐴒𐴧𐴗𐴝 𐴋𐴡𐴣𐴀𐴌 𐴔𐴡𐴖𐴑𐴝 𐴀𐴝𐴏𐴠|  𐴀𐴝𐴌 𐴎𐴝𐴌𐴝 𐴀𐴠𐴙 𐴔𐴡𐴇𐴝𐴁𐴧𐴝𐴃 𐴀𐴝𐴊𐴧𐴠 𐴀𐴝𐴊𐴡𐴌 𐴕𐴥𐴡𐴐𐴄𐴡 𐴒𐴡𐴙𐴃𐴧𐴡 𐴏𐴝𐴛 𐴁𐴠𐴐𐴥𐴡𐴑  𐴃𐴝𐴌𐴝 𐴌𐴡𐴇𐴞𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴀𐴦𐴡𐴓𐴡𐴌 𐴔𐴡𐴏𐴞𐴁𐴡𐴃𐴡𐴃 𐴉𐴠𐴓𐴝𐴕𐴡𐴌 𐴈𐴡𐴏𐴟𐴌𐴞 𐴒𐴡𐴌𐴞𐴁𐴡| 𐴀𐴡 𐴀𐴝𐴣𐴀𐴌𐴝𐴌 𐴁𐴤𐴝𐴘𐴧𐴝𐴕! 𐴀𐴝𐴓𐴧𐴝𐴤 𐴃𐴝𐴓𐴝𐴌𐴠 𐴋𐴡𐴌𐴡!

𐴶- 𐴀𐴡𐴕𐴡𐴌𐴝𐴌𐴠 "𐴕𐴞𐴎𐴡𐴌 𐴊𐴠𐴐" 𐴀𐴞 𐴏𐴥𐴞𐴕𐴃𐴧𐴝 𐴃𐴧𐴟𐴕 𐴕𐴠𐴀𐴠𐴓𐴠 𐴀𐴝𐴀𐴕 𐴉𐴡𐴌𐴞𐴁𐴡

𐴀𐴡𐴕𐴡𐴌𐴝𐴌 𐴎𐴞𐴃𐴡 𐴀𐴝𐴊𐴧𐴠 𐴐𐴠𐴑𐴥𐴝𐴏𐴃 𐴀𐴡𐴕𐴡𐴌 𐴀𐴞𐴘𐴝𐴕 𐴀𐴟𐴔𐴧𐴝𐴃𐴡𐴌 𐴎𐴞𐴃𐴡𐴕 𐴀𐴝𐴊𐴧𐴠 𐴐𐴠𐴑𐴥𐴝𐴏𐴃 𐴀𐴡𐴀𐴕𐴡𐴌 𐴏𐴝𐴀𐴃𐴠 𐴃𐴝𐴓𐴧𐴟𐴑| 𐴀𐴡𐴕𐴡𐴌𐴝𐴌 𐴊𐴠𐴐𐴡𐴌 𐴋𐴦𐴡𐴙𐴓𐴧𐴝 𐴀𐴝𐴌𐴘𐴥𐴡 𐴁𐴦𐴡𐴃 𐴊𐴠𐴐𐴡𐴃 𐴀𐴞 𐴔𐴡𐴏𐴞𐴁𐴡𐴃 𐴀𐴝𐴏𐴠| 𐴀𐴞𐴃𐴡𐴓𐴧𐴝 𐴀𐴡𐴕𐴡𐴌𐴝𐴌𐴠 𐴅𐴞𐴇𐴝𐴊𐴡𐴓𐴧𐴝 𐴁𐴡𐴓𐴞 𐴃𐴡𐴘𐴧𐴝𐴌𐴞 𐴓𐴡𐴀𐴕 𐴉𐴡𐴌𐴞𐴁𐴡| 𐴀𐴡𐴕𐴡𐴌𐴝𐴌 𐴉𐴟𐴌𐴝 𐴊𐴟𐴕𐴞𐴘𐴝𐴌𐴠 𐴀𐴝𐴎𐴝𐴊 𐴒𐴡𐴌𐴡𐴕𐴡𐴌 𐴏𐴥𐴞𐴕𐴃𐴝 𐴉𐴠𐴑𐴠𐴌 𐴒𐴡𐴌𐴡𐴕 𐴉𐴡𐴌𐴞𐴁𐴡|  𐴀𐴡𐴕𐴡𐴌𐴝𐴌𐴠 𐴕𐴞𐴎𐴡𐴌 𐴊𐴠𐴐 𐴀𐴞 𐴏𐴥𐴞𐴕𐴃𐴝 𐴉𐴠𐴑𐴠𐴌𐴡𐴃𐴧𐴟𐴕 𐴕𐴠𐴀𐴓𐴝𐴘 𐴉𐴟𐴌𐴝 𐴔𐴟𐴏𐴓𐴞𐴔 𐴀𐴟𐴔𐴧𐴝𐴃𐴡𐴌 𐴏𐴝𐴀𐴃𐴠 𐴈𐴝𐴔 𐴉𐴟𐴌𐴝 𐴀𐴡𐴔𐴧𐴡𐴃𐴡𐴓𐴧𐴝 𐴈𐴝𐴔 𐴒𐴡𐴌𐴡𐴕 𐴎𐴟𐴌𐴟𐴌𐴞| 𐴀𐴟𐴔𐴧𐴝𐴃𐴡𐴌 𐴔𐴟𐴅𐴝𐴇𐴞𐴊 𐴁𐴤𐴝𐴘𐴧𐴝𐴕𐴊𐴡𐴌 𐴏𐴝𐴣𐴀𐴃𐴠 𐴀𐴠𐴑𐴝𐴄𐴧𐴝 𐴀𐴡𐴀𐴕𐴡𐴌 𐴊𐴝𐴌𐴝𐴘 𐴀𐴡𐴕𐴡𐴌𐴝𐴌 𐴀𐴝𐴎𐴝𐴊𐴞 𐴅𐴡𐴓𐴊𐴞 𐴀𐴡𐴘𐴁𐴡 𐴀𐴞𐴚𐴐𐴦𐴝 𐴀𐴝𐴓𐴧𐴝𐴤|𐴱

𐴀𐴡 𐴀𐴝𐴌𐴑𐴝𐴕𐴡𐴌 𐴔𐴟𐴏𐴡𐴓𐴔𐴝𐴕 𐴁𐴤𐴝𐴘𐴧𐴝𐴕!  𐴀𐴡 𐴌𐴡𐴇𐴝𐴙𐴚𐴒𐴙𐴝 𐴓𐴞𐴋𐴝𐴌 𐴀𐴦𐴡𐴓!  𐴀𐴡 𐴌𐴡𐴇𐴙𐴚𐴒𐴙𐴝  𐴁𐴤𐴝𐴕𐴊𐴡𐴌𐴠 𐴔𐴡𐴊𐴡 𐴒𐴡𐴌𐴡𐴘𐴧𐴝 𐴁𐴝𐴚𐴓𐴝𐴊𐴠 𐴀𐴝𐴊𐴧𐴠 𐴀𐴡𐴙𐴕𐴧𐴡 𐴊𐴠𐴐 𐴀𐴥𐴡𐴑𐴧𐴡𐴓𐴡𐴌 𐴀𐴠𐴕 𐴅𐴞 𐴘𐴥𐴡𐴌 𐴏𐴝𐴣𐴀𐴃 𐴃𐴝𐴓𐴧𐴟𐴑𐴞 𐴁𐴤𐴝𐴘𐴧𐴝𐴕! 𐴀𐴡𐴕𐴡𐴌𐴝𐴌 𐴈𐴝𐴣𐴏𐴠 𐴊𐴡𐴌𐴈𐴝𐴏𐴃, 𐴀𐴡𐴌𐴠 𐴁𐴡𐴘𐴝𐴕 𐴒𐴡𐴌𐴝 𐴀𐴡𐴘𐴧𐴠𐴊𐴠 𐴂𐴡𐴙𐴕𐴄 𐴓𐴡𐴘 𐴀𐴡𐴕𐴡𐴌𐴝 𐴏𐴥𐴞𐴕𐴃𐴝 𐴉𐴠𐴑𐴠𐴌 𐴒𐴡𐴌𐴞𐴁𐴝| 𐴀𐴡𐴕𐴡𐴌𐴝𐴌 𐴈𐴝𐴔 𐴀𐴝𐴊𐴧𐴠 𐴃𐴇𐴝𐴌𐴞𐴑𐴡𐴌𐴠 𐴐𐴡𐴌𐴞𐴔𐴡𐴃𐴡𐴌 𐴇𐴡𐴑𐴟𐴔 𐴔𐴡𐴎𐴠𐴕 𐴀𐴠𐴕𐴃𐴞𐴎𐴝𐴔 𐴒𐴡𐴌𐴞𐴁𐴝|  𐴀𐴝𐴌 𐴀𐴝𐴓𐴧𐴝𐴤 𐴃𐴝𐴓𐴝𐴌𐴠 𐴋𐴡𐴌 𐴒𐴡𐴌𐴡| 𐴀𐴠𐴚𐴐𐴦𐴝 𐴀𐴝𐴓𐴧𐴝𐴤!  𐴀𐴠𐴑𐴊𐴞𐴕 𐴀𐴝𐴌𐴑𐴝𐴕 𐴘𐴥𐴡 𐴎𐴝𐴓𐴞𐴔 𐴁𐴟𐴊𐴧𐴞𐴏 𐴀𐴦𐴡𐴓𐴡𐴌 𐴇𐴥𐴝𐴃𐴡𐴃𐴧𐴟𐴕 𐴀𐴝𐴎𐴝𐴊 𐴀𐴡𐴘𐴁𐴡|𐴱

𐴀𐴡𐴕𐴡𐴌𐴝𐴌 𐴁𐴤𐴝𐴘𐴢
𐴀𐴝𐴇𐴔𐴝𐴊 𐴐𐴥𐴝𐴤
𐴲𐴶 𐴖𐴝𐴑𐴄𐴟𐴁𐴝𐴌𐴢 𐴲𐴰𐴲𐴱 𐴀𐴞𐴚𐴌𐴠𐴎𐴞  

𐴕𐴟𐴄𐴢: 𐴀𐴝𐴀𐴛 𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕 𐴁𐴝𐴓𐴝 𐴒𐴡𐴌𐴞 𐴈𐴡𐴘𐴃𐴤𐴡 𐴕𐴡 𐴉𐴝𐴌𐴞|  𐴀𐴠𐴙 𐴔𐴝𐴑𐴟𐴓𐴤𐴝 𐴀𐴞𐴘𐴝𐴕 𐴌𐴡𐴇𐴝𐴙𐴚𐴒𐴙𐴝 𐴎𐴟𐴁𐴝𐴕𐴡𐴃 𐴀𐴝𐴣𐴀𐴌𐴝𐴌 𐴀𐴠𐴑 𐴊𐴞𐴕𐴞 𐴁𐴤𐴝𐴘 𐴉𐴝𐴇𐴞𐴔 𐴔𐴟𐴌𐴝𐴊𐴠 𐴃𐴡𐴌𐴅𐴟𐴔𐴝 𐴒𐴡𐴙𐴅𐴧𐴠| 𐴀𐴝𐴓𐴧𐴝𐴤 𐴃𐴝𐴓𐴝 𐴃𐴝𐴌𐴠 𐴀𐴡𐴃𐴟 𐴁𐴝𐴓𐴝 𐴀𐴝𐴅𐴥𐴡𐴌 𐴊𐴝𐴕 𐴒𐴡𐴌𐴟𐴑|𐴀𐴦𐴝𐴔𐴞𐴕|