عن تحسين اللغة الإنجليزية
بداية عاوز أقول:
-
أن الموضوع يستحق التعب والصبر والمجهود والفلوس اللي هتتصرف فيه، يستحقه بكل ما تعنيه الكلمة من معنى.
- أنا مش متخصص، أنا بتاع هندسة وبيزنس وتسويق، مش سوبرمان في الانجليزي، بمارس الترجمة كهواية فقط، تعليمي كله -عدا الهندسة- ذاتي 100%
-
دا بوست طويل، لو كملته للآخر أضمنك فائدة كويسة إن شاء الله.
-
هتحتاج ورقة وقلم علشان تسجل ملاحظاتك وخطواتك العملية واسئلتك اللي مش متجاوبة في البوست.
لو انت مهتم بتحسين لغتك الإنجليزية فانت غالبا تعرضت لأنواع كتير من النصائح والخطط والكورسات والبرامج وقنوات اليوتيوب والكتب والقصص والمقالات والأبحاث..
وبما أنك لسه مهتم بالموضوع فدا معناه -غالبا- بردو أنك لسه ما وصلتش للمستوى اللي بتستهدفه، ودا غالبا لأسباب زي التشتت بين المصادر والحاجات اللي قولناها فوق، أو أن الحلول نفسها مش فعالة بالقدر الكافي، أو مش مناسبة لظروفك ومستواك وذوقك.. في البوست دا هنحاول نقارب To approach المسألة دي بشكل مختلف شوية، يمكن يناسب بعض الناس..
لاحظ أني بتكلم هنا عن "تحسين" اللغة مش تعلهما من البداية، ودا لأن معظمنا -نحن أبناء المدارس العربية- بنكون درسنا أساسيات اللغة بشكل كافي في مراحل التعليم الأساسي، وفي الجامعة بردو، أقصد أنه على أقل تقدير معاك الحد الأدنى اللي يخليك مش محتاج تتعلم الأساسيات، بتعرف تقرا وتنطق، حتى لو مش بتستوعب النص، لو بسيط مش معقد وما فيهيهوش أساليب مكلكعة هتفهم منه قدر كويس، تعرف تعرف نفسك بدرجة كويسة، عندك استعداد ما للتواصل سماعا وتحدثا، مش بدرجات عظيمة، مجرد الأساسيات، نقول مثلا القدر الكافي للنجاح في اختبار الثانوية العامة = كافي جدا، دا الحد الأدنى اللي بتكلم عنه واللي معظمنا يحوزه بالفعل أو أعلى منه كمان، مش كدا؟
يجي هنا خبر كويس، وهو أنك دلوقتي مش محتاج كورسات خلاص، مش محتاجها بشكل أساسي وضروري، ممكن بشكل تكميلي جانبي، لسه مفيدة أكيد، لكن مش حياة أو موت، تقدر تشتغل وتحسن مستواك من غيرها عادي جدا؛ لو كملت البوست للآخر..
نيجي بقى للمطلوب، إيه المطلوب؟ عاوزين نوصل لإيه بالضبط؟
أظن أن الدوافع الشائعة وراء السعي لتحسين الانجليزية هي:
-
تحسين القدرة على التعلم والبحث والاستفادة من المحتوى الانجليزي المتاح.
-
التأهل والترقي الوظيفي، تزود فرصك في الحصول على وظيفة أحسن.
-
الدراسة ودخول اختبارات الكفاءة زي TOEFL و IELTS.
-
المنظرة والتنطيط على خلق الله وتبين أنك ابن ناس ومتعلم وبتعرف تعوج لسانك، فلو دي نيتك حاول تغيرها لحاجة أحسن.
كلها أهداف مفهومة، وكلها ممكن نوصلها بطريقتين، أو خطتين، أو أسلوبين:
-
دا الأسلوب اللي كلنا بنحاول نتبعه، واللي معظمنا بيفشل فيه للأسف، وهو التعلم السريع المضغوط، سبرينت شهرين ونص تلت شهور، بعدها نكون وصلنا للمستوى اللي بنحلم بيه، هل دا مستحيل؟ دا غلط؟ الإجابة على السؤالين: لا، المشكلة بس أنه مش مناسب لكل الناس، لأنه بيحتاج تفرغ تام، أو شبه تام، يعني متوسط 4 ساعات يوميا مثلا لمدة 3 شهور على أقل تقدير.. دا مناسب لمين؟ دا مناسب لحد مضغوط في الوقت، عنده معاد محدد ملتزم بيه، ليكن فرصة سفر مثلا أو اختبار دراسي ما، والحقيقة أن في ناس كتير في ظروف مشابهة قدرت تنجح وتحقق مستويات كويسة بالأسلوب دا، من غير معجزات ولا إمكانات خيالية ولا 20 ساعة في اليوم مثلا، علشان تحقق دا محتاج تاخد مسار من تلاتة، اتنين بفلوس، وواحد من غير فلوس:
-
تشترك في كورس مكثف على الأرض، ودا هيوفرك متابعة + بيئة مناسبة للتواصل والممارسة، مع قدر كافي من الالتزام والتركيز هتبقى كويس.
-
تشتري برنامج Rosetta stone، ودا من أعظم الحلول على الإطلاق، متاح للموبايل والويب واللاب توب، أرخص من من معظم الكورسات على الأرض، وفيه إمكانيات مذهلة، اضمنلي ساعتين في اليوم لمدة 3 شهور وأضمنلك أن مستواك يفوق طموحاتك بمراحل بعون الله..
-
تتشقلب مع نفسك في المصادر المتاحة على النت، وتتابع أي برنامج من البرامج الي صممها المتخصصين، ممكن تنزل البرنامج دا (zAmericanEnglish) http://bit.ly/2LrlOFM ، برنامج للموبايل، محتوى قيم جدا جدا.
-
دا تمرين مفيد في المهارات الصوتية والتحدث https://bit.ly/3oVR4fF
-
مهما كان اختيارك من التلاتة، هتحتاج تعمل حاجتين:
-
خطة زمنية مفصلة حسب ظروفك، ما تقلش 3~4 ساعات يوميا كحد أدنى، وحاول تبدأ بدري علشان تدي لنفسك مساحة زمنية أكبر.
-
تشتغل ممارسة مع نفسك، قراءة (قراءة بدون صوت + قراءة بصوت عالي(مهم) ) وكتابة وسماع، هنزل شوية مصادر في آخر البوست إن شاء الله، ودا ما يقلش عن نص الوقت اللي حددته في جدولك يعني ساعة ونص ساعتين على الأقل يوميا
لو بتجهز لاختبار كفاءة هتحتاج تزود كمان حاجة، برنامج إعداد للاختبار، شهر ونص شهرين، ودا مش هنفصل فيه دلوقتي وهنكتفي بلنكات مفيدة في الآخر
2) ممكن نسميه ال Lean improvement، أو التحسين على الهادي، بمعنى أننا مش مستعجلين، أو الأهداف الزمنية بتاعتنا مش مضغوطة أو محددة، ودا خيار كويس ومجرب وناجح..
تفاصيله؟
تفاصيله أننا هنقدم الممارسة على الدراسة، الممارسة هتكون هي الأصل، القواعد والشروحات والكورسات على الهامش، انك تنط في البحر على طول، ما تخافش، مش هتغرق، انت معاك الأساسيات زي ما اتفقنا، هتشتغل على المهارات العامة، مهارة القراءة والسماع والكتابة في الموضوعات العامة، نستهلك مقالات وأخبار ومنشورات سوشيال ميديا وفيديوهات عامة وخفيفة، نكتب خواطر بالانجليزي، خفيفة بكلمات عادية، مش متحتاج تذاكر قواعد زي ماقلنا، ولا تحفظ جداول كلمات وجمل والكلام دا، مجرد تظبط وقت ثابت يومي، نص ساعة ساعة في اليوم، مع الوقت هتلاقي انجليزيتك بقيت تمام، هتتعب شوية في الاول وهتحتاج تصبر وتتصاحب على ترجمة جوجل، ومن يخطب الحسناء لم يغلها المهر، مش كدا ولا إيه؟
هتعمل نفس الكلام دا مع تخصصك، لأن مهارة القراءة العامة حاجة والقراءة المتخصصة حاجة تانية غيرها، ، هتشوف المجال المتخصص اللي انت مهتم تقرا فيه، الهندسة أو الاقتصاد مثلا، تبدأ واحدة واحدة تستهلك مواد مبسطة في المجال دا، المواد الخفيفة والأخبار والمدونات وما إلى ذلك، وبعدين تنتقل للكتب الخفيفة بردو، وبعدين تنطلق في قراءة كتب التخصص زي ما تحب..
بالمناسبة، معظم الناس اللي أعرفهم بيعرفوا انجليزي كويس اعتمدوا على الممارسة أكتر من المذاكرة والدراسة والكورسات، المهم المداومة، كلمة السر هي القليل الدائم، لو حققته تقدر تنجح في أي تحقيق هدف إن شاء الله.
مصادر للقراءة العامة:
-
Medium.com من أهم المواقع على الشبكة، هيحتاج VPN علشان ما بيتشغلش في مصر في أغلب الأحيان
-
Reddit.com
-
Stumbleupon.com
-
كتب ثنائية اللغة، http://bit.ly/2Y5Blwn
دول كفاية جدا في القراءة، جربهم، اتعلم ازاي تتعامل معاهم، كون عادة دخولهم بصفة دورية واستعمالهم، هتستفيد جدا جدا جدا.
السماع:
برامج:
-
ممكن تنزل برنامج زي http://bit.ly/2J2YHzw على الموبايل تتسلى فيه وقت الملل
-
دي إضافة لجوجل كروم هتساعدك في ترجمة أي كلمة بمجرد ما تضغط عليها ضغطة مزدوجة، مفيدة بشكل يصعب وصفه: http://bit.ly/2VJzvnj
قنوات تعليمية:
اختبارات الكفاءة اللغوية:
-
لمزيد من المحتوى ممكن تشترك في جروب علم نفسك من هنا: http://bit.ly/get-educated-fb
طبعا في مصادر تانية كتير جدا، لكن الفوضى ودوشة المصادر مش في صالحنا خالص، فدول كفاية جدا إن شاء الله.
فاضل إيه ؟
فاضل انك، بعد ما سجلت ملاحظاتك دلوقتي، وشوفت اللنكات كلها، وحددت هتختار أي مسار من المسارين
؛ تبدأ تكتب خطتك باختصار في شكل نقط، وبعدين تراجعها مرتين، وبعدين تكتبها بالتفصيال، هتحدد في الخطة دي جدولك الزمني وأهدافك الكبيرة اللي قسمتها على أهداف صغيرة ملموسة، وتبدا تنفذها من النهاردة فورا، ما تستناش لبكرة..
الموضوع لسه فيه كلام كتير ممكن يتقال، وفي حاجات ما تعرضتلهاش علشان البوست ما يطولش أكتر من كدا..
لو في حاجة معينة عاوز تعرف عنها أكتر أو تحب نفصل فيها أكتر، يا ريت تقولنا..