د بندیانو د خلاصون د پروسې په وړاندې د خطر په اړه د اسلامي امارت د ویاند څرګندونې
اسلامي امارت د دقیقو او مستندو استخباراتي معلوماتو په اساس خبرداری ورکوي چې د کابل ادارې له زندان پلچرخي څخه د باقې پاتې بندیانو د خلاصون د پروسې په وړاندې جدي امنیتي خطر متوجه دی.
یوه داعشي ډله د کابل ادارې د استخباراتو، د ځينو نظامیانو او د زندان د امنیتي پوستو د قومندانانو په مرسته، هماهنګي او همکارۍ اراده لري چې په هغو نقلیه وسائطو باندې برید ترسره کړي چې د پلچرخي له زندان څخه به باقې پاتې بندیان انتقالوي.
دوی غواړي چې په دې جنایت سره د مذاکراتو پروسه مختل کړي او همدا راز له دغو بندیانو څخه خپل غچ واخلي.
اسلامي امارت په دې اړه جدي انديښنه لري او ټولو ذي دخله خواووته خبرداری ورکوي چې د دغه خطر د مخنیوی لپاره اقدام وکړي او د بندیانو د انتقال پروسه په احتیاط او ډيره مصئونه توګه ترسره کړي. خدای مه کړه د کوم خطر د پيښیدو په صورت کې به ټول هغه جهتونه مسئول وي چې په دې برخه کې غفلت وکړي.
ذبیح الله مجاهد د اسلامي امارت ویندوي
۲۲/۱/۲۱۴۴۱هـ ق
۲۲/۵/۱۳۹۹هـ ش ــ 2020/8/12م